លោក Scott Lear អ្នកឯកទេសខាងជំងឺបេះដូងក្នុងមន្ទីពេទ្យ St Paul ក្នុងប្រទេសកាណាដា ដែលបានធ្វើការសិក្សាស្រាវជ្រាវ បានមានប្រសាសន៍ថា ៖ «ពេលដែលមនុស្សធ្វើលំហាត់ប្រាណទៀងទាត់ វាពិតជាជួយកាត់បន្ថយហានិភ័យនៃជំងឺបេះដូង និងការស្លាប់មុនអាយុបានពិតមែន។ ការដើររយៈពេល ៣០នាទីជាប្រចាំថ្ងៃ ពិតជាមានផលប្រយោជន៍ច្រើនមែនទែន ហើយការធ្វើសកម្មភាពណាដែលបញ្ចេញថាមពលរាងកាយរាល់ថ្ងៃពិតជាជួយកាត់បន្ថយហានីភ័យផ្សេងៗបានផងដែរ»។
លោក បានមានប្រសាសន៍បន្ថែមទៀតថា ដើម្បីការពារ និងព្យាបាលជំងឺបេះដូង អ្នកត្រូវចំណាយលុយលេបថ្នាំ និងញ៉ាំបន្លែ ផ្លែឈើផ្សេងៗជាដើម។ ប៉ុន្តែ អ្នកក្រមិនមានលទ្ធភាពទិញរបស់ទាំងនោះមកញ៉ាំនោះទេ។ តែត្រូវចាំថា ការដើរគឺមិនចាំបាច់ចំណាយលុយមួយសេនទេ ហើយថែមទាំងជួយឲ្យអ្នកមានសុខភាពល្អទៀតផង។
អង្កការសុខភាពពិភពលោក (World Health Organization) បានណែនាំឲ្យមនុស្សដែលមានវ័យចាប់ពី ១៨ ទៅ៦៤ឆ្នាំ គួរតែយ៉ាងហោចណាស់ចំណាយពេល ១៥០នាទីក្នុងមួយសប្ដាហ៍ធ្វើលំហាត់ប្រាណ ឬសកម្មភាពណាដែលបញ្ចេញថាមពលរាងកាយ ហើយអ្នកដែលហាត់ប្រាណយកសាច់ដុំ គួរតែចំណាយពេលយ៉ាងតិច២ថ្ងៃក្នុងមួយសប្ដាហ៍។
ក្រុមរបស់លោក Scott Lear បានរកឃើញផងដែរថា ប្រសិនបើប្រជាជនក្នុងពិភពលោកអាចធ្វើបានដូចអ្វីដែលអង្កការសុខភាពពិភពលោក (The World Health Organization) បានណែនាំមែន នោះមនុស្សម្នាក់ក្នុងចំណោម ១២នាក់ដែលមានការស្លាប់មុនអាយុ អាចនឹងត្រូវកាត់បន្ថយ ហើយ ៤.៦ នៃករណីជំងឺបេះដូងអាចនឹងត្រូវបានទប់ស្កាត់៕
ប្រភពពី៖ BizKhmer
ចែករំលែកអត្ថបទ
